Xafladaas oo siweyn loo soo agaasimey, waxaa ka soo qayb galey dadweyne aad u tiro badan iyo masuuliyiin ka kala socdey jaaliyadaha kala duwan ee magaalada Toronto iyo agagaadhkeeda.

Ugu horeyntii waxaa halkaas ka hadley kana waramey mahiimada ay jaamacada Burco u leedahey deegaanka Gobolka Togdheer iyo baahida loo qabo in laga qeyb qaato dhismaheeda Dr. Maxamed Hussein X. Ali oo loo yaqaano (Khaan). Dr. Khaan oo isagu dhawaan ka soo laabtey dalkii (Somaliland), waxaa kaloo uu sawir guud ka bixiyey nolosha dalka, horumarka dhaqaalaha iyo tartanka wax aqooneed ee ka socda somaliland. Sidoo kale, Mudane Khaan waxaa uu sitafatiran uga waramey mushruuc uu hadda la wado hayadda UN-HABITATE oo ka socda Magaalada Hargeysa. Mudane Khaan, waxaa sheegey in mashuurcani yahey mid lagu diiwaan gelinaayo hantidada dhulka ee magaalada Hargeysa isla markaana lagu kala xadeynaayo deegaanka magaalada iyadoo la adeegsanaayo aalado casri ah iyo systemka maabamka caalamka lagu sameeyo ee loo yaqaano (GIS).





Sidoo kale waxaa isna hadal qiira leh ka soo jeediyey kalankaas indheergaradka Magaalada Toronto
Mudane Ducaale Mohamed Xirsi oo ku guubaabiyey dadweynahii ka soo qayb galey in ay waxbarashadu tahey wax naf iyo maalba loo huro jahliguna yahey cadowga ugu horeeya ee bini’aadamka. Odey
Ducaale Mohamed Xirsi waxaa kaloo uu ka waramey halganka ay waxbarashadu soo martey iyo dhibaatooyinkii lagala kulmey bilowgii, waajibkuna yahey in loo hiiliyo aqoonta guud ahaan.

Xafladaas oo aan loo kala hadhin kana soo qayb galeen Fanaaniin caan ahi sida Xasan Adam Samater iyo Abdi Jibaar Al khaliji, waxay aheyd mid isugu jirta jawi guubaabo iyo mid madadaalo.
Hadaba, iyadoo aan maqaal kaliya ah lagu soo koobi kareyn aqoon-yahanadii ka hadley goobtaasi , waxaa xusid mudan in aan taabano qaar ka mid ah sida Dr Abdi Salaan sheikh Xasan Nuur iyo Foosiya Yusuf X. Adam oo ah aasaassayaashii labada jaamacadood ee Camuud iyo Hargeysa University. Sidoo kale waxaa isna hadal taariikhi ka soo jeediyey kulankaas, Dr. Faarah Ahmed Hirsi oo ah wakiilka Jaamacada Burco ee Magaalada Toronto iyo Odey Abdi Xuseen Ciise.

Dhinaca kale, waxaa isaguna ka soo qayb galey xafladaas iyada ah Dr. Abdishakuur Ali Jawhar oo dhawaan ka soo laabtey dalkii (somaliland) kuna hawlan mashruuc la xidhiidha sidii wax looga qaban lahaa Cudurada Maskaxda. Dr. Abdishakuur, waxaa uu taabtey aadna ugu nuux nuuxsadey mahiimada ay leedahey aqoontu iyo baaahida hadda loo qabo.

Dr. Abdi shakuur, waxaa kaloo uu sheegey in uu aad welwelsan yahey dhibaatada uu qaadku ku hayo shacabka Somaliland iyo sida loogu baahan yahey in loogu gurmado badbaadinta jiilk soo koraaya.

Xafladaas oo u jeedadeedu aheyd taakuleynta jaamacada Burco, waxay ku dhamaatey guul iyo is afgarad ku saleysan wada shaqeynta jaaliyadaha Somaliland ee dibeda iyo abuurida dalad mideysa dhamaan jaaamacadaha somaliland si loo xaqiijiyo taabagalka tacliinta sare ee dalka.


Ali Jama -Toronto

ahmedfayr@hotmail.com

source: Hadhwanaagnews.com